By Patrick Matbob
Moa long 150 memba bilong Katolik sios long PNG na Solomon Ailans i
bung long Madang long bikpela Jeneral Asembli miting.
Dispela miting i kamap long Divain Wot Yunivesiti long
Tunde Novemba 5 i go inap long Sande Novemba 10.
Long Tunde Presiden bilong Divain Wot Yunivesiti Fr
Jan Czuba na Asbishop bilong Madang Steve Reichert i bin welkamim ol deleget.
Asbishop Steve i bin tokim ol deleget olsem planti
pipel i no harim yet gut nius bilong Jisas. Em i tok planti tu i lusim sios
bilong wanem ol i no amamas long ol sin pasin bilong ol memba bilong sios.
Em i tok ol sevis em sios i save givim long edukesen
na health i no kamap gut tumas long sampela ples.
Em i tok i gat planti pasin nogut bilong pait na
bagarapim arapela i kamap long wol na kantri bilong yumi tude.
Em i salensim ol deleget long toktok long ol dispela
hevi na painim rot long daunim ol.
Bihain ol deleget i bin wokim wanpela seremoni bilong
bungim ol wara em ol i bin kisim i kam long ol daiosis bilong ol yet. Ol I bin
kapsaitim olgeta dispel wara i go insait long wanpela graun sospen bilong ol
asples Madang na miksim. Taim ol i kapsaitim wara, ol i pre long God i ken
givim wara i gat laip long ol pipel bilong ol diosis bilong ol. Dispela pasin
bilong miksim wara i soim olsem ol Katolik bilong olgeta hap bilong PNG na
Solomon Ailens I wanbel long painim wara tru bilong laip.
Dispela jenerel asembli bai i toktok lukluk tu long ol
bikpela hevi I kamap long ol pipel bilong PNG na Solomon Ailen. Ol kain hevi ol
bai toktok long en em pasin bilong posin na sanguma, pasin bilong brukim marit,
pasin bilong korapsen, ol hevi i save brukim marit, pasin bilong paitim na
bagarapim ol meri na pinkini, na planti moa.
No comments:
Post a Comment